Уваскрэсенне Хрыстова. Расклад святочных набажэнстваў у касцёле святой Ганны
На гэтым тыдні католікі сустракаюць галоўнае свята хрысціянства – Пасху. Яно ўмацоўвае традыцыі нашых продкаў, нясе мір і згоду ў кожную сям’ю, аб’ядноўвае ўсіх нас у жаданні тварыць справы міласэрнасці, дзяліцца адзін з адным душэўным цяплом.
Шаноўныя жыхары Дзяржыншчыны!
Сардэчна віншуем вас са святам Уваскрашэння Хрыстова!
Калі чуем радаснае «Хрыстос уваскрос!», узгадваем пра перамогу Бога над усялякім злом. Гэта ўзмацняе нашу надзею і дадае сіл, каб не толькі сузіраць гэтую перамогу, але і быць яе ўдзельнікамі ў штодзённасці.
Падчас велікоднага снядання ў кругу сям’і мы частуемся асвечанымі велікоднымі прысмакамі і дзякуем Богу за родных і сяброў, за чарговую вясну нашага жыцця. Фарбаванае яйка, прыгожая пасхальная булка, розныя кіўбасы – гэта ўсё нагадвае нам пра тое, што божае і чалавечае існуе разам: мы працуем, выконваем свае абавязкі, а Бог падтрымлівае нас і благаслаўляе, асабліва тады, калі жыццё ператвараецца ў крыжовы шлях.
Няхай кожны дзень нашага жыцця, усе справы і клопаты будуць напоўнены радасцю ўваскрашэння! Уваскрослы Хрыстус няхай узмоцніць веру, надзею і ўзаемную любоў, адорыць здароўем і ўсялякім шчодрым благаславеннем!
Хрыстос уваскрос!
кс. Юрый Бараўнёў (Волма)
кс. Сяргей Дабрагост (Дзяржынск і Негарэлае)
кс. Дзяніс Шастаковіч (Фаніпаль)
Расклад святочных набажэнстваў у касцёле Святой Ганны ў Дзяржынску:
- 4 красавіка – асвячэнне велікоднай ежы: з 12.00 да 16.00 кожную гадзіну; начная ўрачыстая Імша – у 21.00;
- 5 красавіка – святочныя імшы ў 6.00 і 8.00.