Першыя выпускнікі Дварышчанскай сярэдняй школы заклалі сквер у яе гонар
Сустрэча з аднакласнікамі амаль праз паўстагоддзя… Сёння мала каму ўдаецца падтрымліваць цесную сувязь са сваімі школьнымі сябрамі. Але першы выпуск Дварышчанскай сярэдняй школы стаў выключэннем: дарослыя, сямейныя, занятыя кожным сваімі клопатамі і справамі, яны здолелі не проста знайсці час для сустрэчы, але і закласці ў гонар 50-годдзя роднай альма-матэр цэлы сквер.
Ідэйным натхняльнікам і ініцыятарам акцыі сталі Галіна Касовіч, класны кіраўнік выпускнікоў, і былая вучаніца, а цяпер жыхарка аг. Дворышча Ірына Фіраго. Паколькі школа збіралася святкаваць у 2023-м годзе вялікі юбілей, актывісты звярнуліся з прапановай да дырэктара ўстановы.
Аднак падтрымку ўдалося атрымаць годам пазней – у новага маладога кіраўніка Дзямідавіцкага сельскага Савета Сяргея Прынёва
– Побач са школай, на землях агульнага карыстання, замацаваных за сельсаветам, раней была вялікая пустка. Шмат сіл і часу адымаў яе сезонны абкос – гэта было даволі накладна. Вось мы і падумалі, што было б нядрэнна тут разбіць скверык, – расказвае Ірына Мікалаеўна. – У лютым прайшлі выбары дэпутатаў мясцовых Саветаў, мы далі нашаму абранаму кіраўніку крыху часу, каб асвоіцца. І ўжо літаральна праз тыдзень я прыйшла да яго з нашай прапановай. Трэба сказаць, што падтрымку мы атрымалі адразу ж. Нягледзячы на тое, што першапачаткова фінансавыя выдаткі па высадцы алеі планавалі ўзяць на сябе, Сяргей Сяргеевіч пагадзіўся дапамагчы нам у пошуку спонсара і разбіць на абраным месцы не проста алею, а невялічкі парк.
Экалагічную акцыю прызначылі на красавіцкія выхадныя, у дзень рэспубліканскага суботніка. Для пасадак сабралася 10 чалавек аднакласнікаў, сем’ямі, з дзецьмі і ўнукамі.
– Але фінансава ўдзельнічалі нават тыя аднакласнікі, якія па розных прычынах не змаглі ў гэты дзень быць разам з намі. Напрыклад, некаторыя былі задзейнічаны ў працах на суботніку ад сваіх прадпрыемстваў і арганізацый. У выніку ўдзел у акцыі прымалі мы з мужам Дзмітрыем, Раіса Калоднік разам з сынам Віталем, Станіслава Густоўская з сынам Паўлам, Алена Сініца, Мікалай Дзянісаў з жонкай Наталляй, Іван Петрашкевіч, Уладзімір Леановіч, Ала Шчурко з мужам Аляксандрам, Сяргей Скраблевіч, Леанід Патаповіч, Наталля Празецкая. Гэта з выпускнікоў 1975-га года. Прыемна, што да нас далучыліся ветэраны педагагічнай працы Тамара Пятроўна Дароцкая, Клаўдзія Мікалаеўна Лакісава, Міхаіл Андрэевіч Канавалаў, Алена Іванаўна Лакісава і настаўніца Дварышчанскай школы Валянціна Іванаўна Мацкевіч.
Выбар дрэў для пасадак таксама быў невыпадковы. У гонар кожнага з 20 выпускнікоў высадзілі 20 соснаў. Па парадзе дызайнера, які займаўся планіроўкай будучага парка, туды дадалі яшчэ 9 рабін і кусты спірэі
А таксама ўсталявалі валун з мармуровай таблічкай: «Сквер закладзены першымі выпускнікамі Дварышчанскай сярэдняй школы ў гонар 50-годдзя выпуску. Красавік 2025».
– Сустрэчы выпускнікоў патрэбны для таго, каб успомніць дні сваёй маладосці і юнацтва, папрасіць прабачэння ў кагосьці з настаўнікаў або аднакласнікаў, падзякаваць педагогам, якія паўплывалі на станаўленне і лёс вучняў, пакінулі ў іх часцінку ўласнага сэрца. Мы ўсе бязмерна рады, што наша сустрэча прайшла менавіта ў такім фармаце і засталася ўвекавечана не толькі цёплымі ўспамінамі, але і знакавай добрай справай!
Фота Паўліны Раеўскай
